"OYUN" inklüziv teatrının təqdimatında "Parkda" tamaşası özlüyündə sosial mesajlarla dolu səhnə aktıdır.
Belə ki, cəmiyyətdəki sosial-mənəvi problemlər fonunda müxtəlif qadın qəhrəmanlarını ön plana çıxaran tamaşa, real qəhrəmanların həyat hekayələrinin səhnələşdirilmiş yozumudur. Tamaşada müxtəlif dövlət teatrlarında çalışan peşəkar aktyorlarla yanaşı, əlilliyi olan həvəskarlar da rol alıblar. Tamaşanın əsas məqsədi əlilliyi olan şəxslərin tanınmış aktyorlarla bir layihədə iştirakına şərait yaratmaq və bu yolla onların cəmiyyətə inteqrasiyasına nail olmaqdır.
Tamaşanın səhnələşdirmə və quruluş müəllifi Saida Haqverdiyeva, quruluşçu rəssamı isə İqbal Əliyevdir.

Tragikomik səhnələrin üstünlük təşkil etdiyi birhissəli tamaşada ailədaxili şiddət, xəyanət, eləcə də erkən nikah, məişət zorakılığı və sosial şəbəkələrin insan münasibətlərinə mənfi təsiri kimi məqamlar ön plana çıxarılıb.